A directora rexional de Inserta Empleo en Galicia, Beatriz Gallego, e o noso director, Luis García Deber, acaban de asinar un convenio para fomentar o emprendemento entre as persoas con discapacidade coma medio para acadar a súa inclusión sociolaboral.
Segundo explicou Beatriz Gallego, a colaboración entre as dúas entidades “vainos permitir seguir sumando sinxerxias e coñecementos para que as persoas con discapacidade contemplen o emprendemento coma unha vía posible de integrarse no mercado laboral de xeito exitoso“.
Pola súa banda, Luis García Deber comentou que “esta colaboración coa Fundación ONCE reforza o noso compromiso co autoemprego inclusivo en Galicia e permítenos contar cun aliado estratéxico que achegará coñecemento e apoio no acompañamento a persoas con discapacidade“.
Ambalasdúas entidades comprometémonos a impulsar o espírito emprendedor mediante actuacións de sensibilización, difusión e información conxuntas aproveitando os recursos que se ofrecen, entre outros o programa de emprendemento “Por Talento Emprende” da Fundación ONCE e Inserta Empleo.
Asemade, este acordo contempla a organización de encontros conxuntos (xornadas, seminarios, etc) para dar as persoas emprendedoras con discapacidade a oportunidade de mellorar as súas competencias e cualificación, así como a participación de aquelas persoas con discapacidade usuarias da Fundación Ronsel que queiran ofrecer a súa testemuña en eventos organizados por Inserta Empleo, en calidade de exemplo de boas prácticas.
En definitiva, este convenio fomentará, a través das actividades propostas e das actividades que se podan impulsar conxuntamente, a creación dunha contorna favorable de apoio as novas iniciativas empresariais promovidas por personas con discapacidade.
Neste sentido, Inserta Empleo e a Fundación Ronsel traballarán que podan contar coas mellores condicións para ser viables e sostibles mediante formación, mentoría, identificación de oportunidades de negocio en función das tendencias económicas e a mellora das axudas públicas entre outras accións.
