O 18 de xullo do 2000 comezamos o noso camiño na Coruña. Hoxe, 25 anos despois e con presencia nas 4 provincias galegas seguimos a traballar cun propósito claro, acompañar as persoas para descubrir o seu potencial, superar retos e atopar o seu lugar no mercado laboral. Así, entre todos, construimos unha Galicia máis próspera en igualdade de oportunidades.
O longo destes anos temos apoiado, acompañado e axudado a máis de 25.000 persoas das cales máis de 10.000 recibiron apoio para a súa activación sociolaboral, 9.000 autónomos e emprendedores consolidaron os seus negocios e acadamos un 90% de éxito nos nosos programas de acompañamento persoalizado.
A base do noso éxito débese o traballo en rede e a estreita colaboración que mantemos con outras entidades, tanto públicas coma privadas, o que nos permite acadar un maior alcance, potenciar os recursos a disposición e, en definitiva, mellorar os nosos servizos e poñelos a disposición das persoas que máis os precisan.
Actualmente contamos con oficinas abertas nas 4 provincias galegas, tanto en contornas rurales coma urbanas. Podes atoparnos en:
- A Coruña
- Santiago de Compostela
- O Porriño (Pontevedra) a través da Rede de Polos de Emprendemento da Xunta de Galicia
- O Barco de Valdeorras (Ourense) a través da Rede de Polos de Emprendemento da Xunta de Galicia
- Chantada (Lugo) no coliving rural de O Pincelo
A nosa aposta pola mellora da empregabilidade e o fomento do autoemprego mantense firme e anímanos a continuar ofrecendo recursos e información obxectiva, realista e gratuita as persoas coas que traballamos, sen xerar dependencia e fomentando sempre a súa autonomía e capacidade de decisión.
Traballamos na mellora da súa situación sociolaboral e na adquisición de novas competencias profesionais, cunha especial incidencia nos colectivos en risco de exclusión, mulleres, mocidade, poboación migrante, persoas en situación de desemprego de longa duración e galegos retornados.
Nun día tan especial coma este queremos reforzar o noso compromiso co emprendemento e a inserción sociolaboral en Galicia e asegurarvos que o mellor está por chegar.
Novas experiencias, novas oportunidades… ¡e moito por compartir!
Grazas pola vosa confianza, grazas por ser parte da Fundación Ronsel.
